Nú er að fara í hönd mikill annatími hjá stéttarfélögum víðsvegar um landið vegna undirbúnings fyrir kjarasamninga. En þeir eru flestir lausir frá og með 30.nóvember næst komandi að undanskildum sjómönnum sem eru með lausa samninga frá 1.janúar 2011.  Félögin hafa leitað til félagsmanna um helstu áherslur og hvaða kröfur eigi að gera, á að leggja áherslu á lægst launin ? verður hægt að ná árangri í viðræðum við stjórnvöld ? ætla sjómenn að leggja áherslu á sjómannaafsláttinn ? osfrv.  Þetta verða ekki auðveldar viðræður og í mörg horn að líta þegar kemur að hvar við eigum helst að setja áherslupunktana okkar. En það sem verður að vera alveg á hreinu er ef við ætlum að ná árangri þá verðum við að standa saman, þannig og eingöngu þannig náum við markmiðum okkar um mannsæmandi laun á vinnumarkaði....
Meira

Þann 15. ágúst sl. tók gildi samkomulag ASÍ og SA um vinnustaðaskírteini og eftirlit á vinnustöðum. Öllum atvinnurekendum í hlutaðeigandi greinum ber að sjá til þess að starfsmenn fái vinnustaðaskírteini þegar þeir hefja störf. Nánar um gildissvið og afmörkun starfa má finna í samkomulaginu sjálfu. Síðar er gert ráð fyrir að aðrar atvinnugreinar fylgi í kjölfarið. Atvinnurekandi og starfsmenn hans skulu bera skírteini á sér og vera reiðubúnir að framvísa því, sé þess óskað af eftirlitsfulltrúa. Með atvinnurekanda er einnig átt við sjálfstætt starfandi einstaklinga. Markmið vinnustaðaskírteina og eftirlits á vinnustöðum er að tryggja að atvinnurekendur og starfsmenn þeirra fari að gildandi lögum, reglugerðum og kjarasamningum. og þannig verði komið í veg fyrir ólöglega háttsemi fyrirtækja á íslenskum vinnumarkaði. ...
Meira

Gylfi Arnbjörnsson forseti Alþýðusambands Íslands fundar með stjórnum aðildarfélaga á Vestfjörðum á Ísafirði í dag. Fundurinn í dag er liður í fundarferð forseta ASÍ með aðildarfélögum um allt land. Gera má ráð fyrir að kjara- og efnahagsmál verði mjög fyrirferðamikil á fundinum í dag, þá verður einnig farið yfir afmarkaðar tillögur að breytingum á skipulagi ASÍ. Meðal annarra mála sem væntanlega verða rædd eru samskifti ASÍ við ríkisstjórnina og SA á samningstímanum sem nú er að líða. Ekki er heldur ólíklegt að kröfugerð aðildarfélaganna vegna komandi kjarasamninga komi til tals auk hinnar klassísku Evrópuumræðu.  

Félagsmönnum í Verkalýðsfélagi Vestfirðinga býðst nú að leita til lögfræðinga félagsins til að fá úr því skorið hvort myntkörfulán sem þeir kunna að hafa tekið gæti verið ólögmæt samkvæmt úrskurði hæstaréttar. Það eina sem þarf að gera er að koma eftirfarandi gögnum til félagsins:

1. Upprunalegur lánasamningur
2. Einn greiðsluseðil sem dæmi ( yfirleytt til staðar á heimabanka )

Félagið mun síðan sjá um að koma ofangreindum gögnum til lögfræðinga félagsins,  sem munu síðan finna út hver staðan  varðandi lánið er og veitt ráðgjöf um framhaldið. Þess má geta að þessi þjónusta er félagsmönnum algjörlega að kostnaðarlausu. Ef í ljós kemur að viðkomandi lán telst ólöglegt og við tæki frekari vinna lögfræðinga við hagsmunagæslu gagnvart bönkum eða fjármálafyrirtækjum yrði eingöngu greidd þóknun á sömu kjörum og félagsmenn njóta hverju sinni.

Vikan 13. - 20. ágúst í Ölfusborgum, sem eru meðal vinsælustu orlofsdvalarstaða félagsins, var að losna vegna forfalla. Þeir sem hafa áhuga ættu að drífa sig, því nú gildir reglan góða: Fyrstur kemur - fyrstur fær. Síminn er 456 3190.