Þann 16. maí sl. var undirritaður „Samstarfssamningur um vettvangsheimsóknir á vinnustaði"  milli ASÍ, SA og RSK.  Markmið samstarfssamningsins er að með virkum hætti sé lögð áhersla á mikilvægi reglufestu og reglufylgni og stuðla þannig að heilbrigðari starfsháttum. Með því að stuðla að bættri tekjuskráningu, að starfsmenn séu skráðir á launaskrá og að formreglur séu á annan hátt haldnar. Tryggja betir skil á opinberum gjöldum ásamt lögboðnum og samningsbundnum framlögum til lífeyrissjóða og stéttarfélaga eigi sér stað með réttum hætti. Samhliða leiðbeiningum um skyldur smærri og meðalstórra fyrirtækja verði lögð rík áhersla á að stemma stigu við svartri atvinnustarfsemi. Verkefnið Felur í sér að kanna og fylgja því eftir að atvinnurekendur og starfsmenn þeirra fari að gildandi lögum, reglugerðum og kjarasamningum.

Verkefnaskipulag verður í meginatriðum þannig að tekin verði fyrir annars vegar staðbundin starfsemi og hins vegar valdar atvinnugreinar. Framvinda verkefnisins er í höndum verkefnisstjórnar er stýrir vali verkefna og ákveður fyrirkomulag að öðru leyti. Sérstök áhersla verður lögð á ferðaþjónustu og bygginga- og verktakastarfsemi en einnig verður ábendingum frá almenningi og eftirlitsfulltrúum ASÍ/SA fylgt eftir.

Verkefnið mun eins og fyrri samstarfsverkefni framangreindra aðila bera yfirskriftina „Leggur þú þitt af mörkum?". Verkefnið verður kynnt formlega á næstu dögum og mun fara í fullan gang í byrjun júní.

Verðlagseftirlit ASÍ kannaði á mánudaginn verð á 45 algengum lyfjum sem seld eru án lyfseðils. Farið var í 18 apótek en Árbæjarapótek, Lyfjaborg Borgartúni og Apótek Ólafsvíkur neituðu þátttöku í könnuninni. Lægsta verðið var oftast að finna hjá Garðs Apóteki Sogavegi í 25 tilvikum af 45. Lyfja Borgarnesi var hins vegar oftast með hæsta verðið eða í 12 tilvikum af 45.
Af algengum lausasölulyfjum má nefna Postafen sem er gefið við ferðaveiki (10 stk.) sem var dýrast á 590 kr. hjá Siglufjarðar Apóteki en ódýrast á 440 kr. hjá Garðs Apóteki, sem er 150 kr. verðmunur eða 34%. Exemkremið Mildison Lipid (30 gr.) var dýrast á 1.525 kr. hjá Rima Apóteki, Langarima en ódýrast á 1.190 kr. hjá Garðs Apóteki sem er 28% verðmunur. Verkjalyfið Treo (500 mg. 20 stk.) var dýrast á 889 kr. hjá Lyfju en ódýrast á 635 kr. hjá Garðs Apóteki sem er 40% verðmunur. Ofnæmislyfið Histasin (10 mg. 30 stk.) var dýrast á 1.359 kr. hjá Lyfju en ódýrast á 988 kr. hjá Apótekinu Akureyri sem er 38% verðmunur.

Könnunin var gerð í eftirtöldum apótekum: Apóteki Hafnarfjarðar, Tjarnarvöllum 11; Apótekarinn Smiðjuvegi, Kópavogi; Apótekinu Akureyri, Furuvöllum 17; Garðs Apóteki, Sogavegi 108; Lyf og heilsu Selfossi; Lyfju Borgarnesi; Lyfjavali Álftamýri, Álftamýri 1-5; Lyfjaveri, Suðurlandsbraut 22; Reykjavíkur Apóteki, Seljavegi 2; Rima Apóteki, Langarima 21; Skipholts Apóteki, Skipholti 50B; Urðarapóteki, Vínlandsleið 16; Akureyrarapóteki, Kaupangi við Mýrarveg; Apóteki Vesturlands, Smiðjuvöllum 32, Akranesi; Siglufjarðar Apóteki, Norðurgötu 4B; Apóteki Garðabæjar, Litlatúni 3; Apóteki Suðurnesja, Reykjanesbæ; Austurbæjar Apóteki, Ögurhvarfi 3. Árbæjarapótek, Lyfjaborg Borgartúni og Apótek Ólafsvíkur neituðu þátttöku í könnuninni. Nánar er fjallað um könnunina á heimasíðu ASÍ.

Mjög góð mæting var á aðalfund Verk Vest sem haldinn var á Hótel Ísafirði í gærkvöldi. Fyrir fundinum lágu efnismiklar laga- og reglugerðabreytingar sem lúta að innra starfi félagsins. Stærsta breytingin er sú að félagið verður skipt upp í starfsgreinadeildir í stað gömlu svæðisdeildanna. En það lá fyrir allt frá stofnun félagsins að í framtíðinni yrði því starfsgreinaskipt. Með þessu móti verða t.d. allir sjómenn innan Verk Vest í einni sjómannadeild, sama á við um aðrar starfsgreinar, þeim verður fundinn farvegur innan nýju deildanna allt eftir kjarasamningssviði hverrar starfsgreinar.

Á fundinum voru einnig samþykktar nýjar starfs- og siðareglur félagsins. Félagið hafið áður sett sér siðareglur árið 2011 og má segja að með þessari breytingu þá hafi þessar eldri reglur verið endurbættar ásamt því að unnið var að því að skerpa á ábyrgð og hlutverki fulltrúa og starfsmanna Verk Vest. En slíkt hefur staðið til í nokkurn tíma. Með þessum hætti verður auðveldara fyrir nýtt fólk að koma að trúnaðarstörfum fyrir félagið þar sem leikreglur og leiðbeiningar sem eru í gildi verða skýrari og aðgengilegri.

Aðalfundur samþykkti einnig að stofna sérstakan styrktar- og fræðslusjóð. Hann er hugsaður fyrir þá félagsmenn sem starfa hjá ríkisstofnunum og sveitarfélögum sem vil sækja sér aukna starfmenntun. Er sjóðurinn hugsaður sem viðbót við þá styrki sem félagsmenn okkar geta sótt um hjá starfsmenntasjóðunum Ríkismennt og Sveitamennt. Eldri félagsmenn sem hafa lokið starfsæfinni hjá félaginu geta einnig sótt um styrki í sjóðinn.

Mikil vinna hefur verið lögð í þær breytingar sem fundurinn samþykkti í gær, og hafa þær verið unnar í nánu samstarfi stjórnar og trúnaðarráðs. Afrakstur þeirrar vinnu var lagður fyrir opinn vinnufund stjórnar og trúnaðarráðs þann 16. apríl síðast liðinn. Afrakstur þess fundar var síðan lagður fyrir aðalfund félagsins til umræðu og afgreiðslu. Í öllu vinnuferlinu var stuðst við þær viðmiðunarreglur sem eru í gildi hjá Alþýðusambandi Íslands ( ASÍ ) ásamt því að horft var til starfs- og siðareglna sem lífeyrissjóðir innan aðildarsamtaka ASÍ hafa verið að setja sér að undanförnu.

Breytingar á lögum og reglugerðum sjóða félagins ásamt nýjum starfs- og siðareglum verða nú sendar til ASÍ sem þarf að staðfesta á breytingarnar áður en þær geta tekið gildi. En breytingarnar þurfa að vera í samræmi við lög og reglur ASÍ.

„ Megin stoð atvinnulífs á Vestfjörðum byggir á sjávarútvegi. Það er ólíðandi að atvinnuöryggi okkar félagsmanna sé háð illa ígrunduðum ákvörðunum stjórnvalda, eins og fyrirhuguð stöðvun rækjuveiða í úthafinu þann 1. júlí 2013 er. Um 120 manns vinna við rækjuveiðar og vinnslu á Vestfjörðum. Inngrip stjórnvalda í grunnatvinnuveg okkar Vestfirðinga hafa í gegnum tíðina kippt fótunum undan heilu byggðarlögunum og valdið óbætanlegum skaða í sumum tilfellum."

Fjölmenni tók þátt í kröfugöngu og hátíðahöldum stéttarfélaganna á Ísafirði og Suðureyri á baráttudegi verkalýðsins 1. maí. Aðalræðumaður dagsins á Ísafirði var Sigurður Bessason formaður Eflingar, en á Suðureyri Lilja Rafney Magnúsdóttir.

Þá flutti Elsa Arnardóttir forstöðumaður Fjölmenningarseturs pistil á Ísafirði um innflytjendur og fjölmenningarsamfélagið.

Tónlistinni var að vanda gert hátt undir höfði á báðum stöðum....
Meira