Verkalýðsfélag Vestfirðinga hefur undanfarið haldið opinn trúnaðarráðsfund og kjarafundi með félagsmönnum sínum víða um Vestfirði til að ræða stöðu mála varðandi forsendubrest í kjarasamningum og mögulega uppsögn samninga. Félagsmönnum Verk Vest svíður það siðleysi og gífurlegar launahækkanir sem sumir hópar fá í sinn hlut, sér í lagi hjá hinu opinbera og fyrirtækjum í eigu hins opinbera. Forsendubrestur samninganna er því ekki aðeins í krónum talinn, heldur heldur er hið mikla siðferðisrof sem átt hefur sér stað sláandi.

Þrátt fyrir að félagsmönnum okkar sé heitt í hamsi var samhljóma álit kjarafundanna að segja ekki upp samningum. Félagsmenn okkar vilja fá hækkunina 1. maí og vilja að verkalýðsforystan fari vel undirbúin af stað í harða kjarasamninga til að rétta okkar hlut í haust. Með þeim hætti höfum við meira til að byggja ofan á og náum væntanlega betri árangri.

Þetta eru skýr skilaboð félagsmanna til forystu Verk Vest, en við vinnum í umboði félagsmanna að hagsmunum þeirra og vilji félagsmanna kemur alltaf til með að verða okkar leiðarljós. Við þökkum félagsmönnum okkar skýr skilaboð og vonum að sami skýrleiki þjappi okkur saman í þeim átökum sem við stefnum í næsta vetur.


miðvikudagurinn 21. febrúar 2018

Kjaramálafundi á Patreksfirði AFLÝST vegna veðurs

Mynd: ruv.is
Mynd: ruv.is

Kjaramálafundi Verk Vest sem halda átti í dag hefur verið AFLÝST vegna veðurs og ófærðar.


mánudagurinn 19. febrúar 2018

Kjaramálafundir Verk Vest 20 - 22.feb

Verkalýðsfélag Vestfirðinga verður með kjaramálafundi á eftirtöldum stöðum dagana 20. - 22. febrúar:

Þriðjudaginn 20. febrúar kl.18:00 í Blábankanum á Þingeyri

Miðvikudaginn 21. febrúar kl.18:00 í Félagsheimilinu á Patreksfirði

Fimmtudaginn 22. febrúar kl.13:00 í Þörungaverksmiðjunni Reykhólum og kl.15.30 í Hólmadrangi á Hólmavík

Formaður og varaformaður Verk Vest munu fara yfir stöðuna í kjaramálum í aðdraganda endurskoðunar kjarasamninga innan aðildarfélaga ASÍ. 


Ríkisstarfsmenn sem eru í aðildarfélögum ASÍ, þ.e. félagsmenn RSÍ, Samiðnar, VM, SGS og félaganna í Flóabandalaginu fá nú í fyrsta sinn svokallaða launaskriðstryggingu sem gefur að meðaltali 1,8% hækkun á laun afturvirkt frá 1. janúar 2017. Þetta er gert á grundvelli samnings sem ASÍ gerði við ríkið 21. desember 2017 og byggir á rammasamkomulagi aðila vinnumarkaðarins frá október 2015.

Leiðréttingin kemur til útborgunar á flestum stöðum þann 1. mars. Þetta er gert til að tryggja að launaskrið á almenna vinnumarkaðnum nýtist líka starfsfólki hjá hinu opinbera. Allir félagsmenn Verk Vest sem starfa hjá ríkisstofnunum eiga rétt á leiðréttingunni.

Tryggingin er mæld út frá launaskriði árin 2013 til 2016 en annað uppgjör verður svo gert fyrir árin 2017 og 2018 og leiðrétt ef tilefni er til. Útfærsla tryggingarinnar er misjöfn eftir landssamböndum.


Alþjóða heilbrigðisstofnunin (WHO) telur að 35% kvenna yfir 15 ára aldri, alls 818 milljónir kvenna í heiminum öllum, hafi upplifað kynferðislegt ofbeldi, heimilisofbeldi eða ofbeldi á vinnustað. Við slíkt verður ekki unað og því hefur Alþjóðasamband verkalýðsfélaga (ITUC) blásið til 23 daga átaks til að vekja athygli á málinu. 

Kynbundið ofbeldi er enn í dag eitt algengasta form mannréttindabrota sem látið er viðgangast. Það þarf að breytast og vitundarvakning um stöðu mála er fyrsta skrefið. Í júní næst komandi verður haldið þing Alþjóða vinnumálastofnunarinnar (ILO) þar sem baráttan gegn kynbundnu ofbeldi verður sett á oddinn. 

Það verða engin sómasamleg störf til þar sem ofbeldi þrífst á vinnustað. Þrátt fyrir það eru ekki til lög á alþjóðlegum grunni sem uppræta ofbeldi og áreitni að neinu marki.

Markmiðið með herferð ITUC er að:

  • Byggja upp móralskan stuðning fyrir þing Alþjóða vinnumálastofnunarinnar (ILO) þar sem ofbeldi á vinnustað verður til umfjöllunar með áherslu á kynbundið ofbeldi.
  • Styðja stéttarfélög í því að útrýma kynbundnu ofbeldi af vinnustöðum í þeirra nærumhverfi. 

Herferðin hefst í dag, 14. febrúar með svokölluðum V-degi sem snýst um baráttuna gegn ofbeldi gegn konum og stúlkum, og því líkur þann 8. mars á alþjóðlegum baráttudegi kvenna.

Nánar hér.


Landssambönd

Verkalýðsfélag Vestfirðinga er aðili að eftirtöldum landssamböndum innan ASÍ.