Verkalýðsfélag Vestfirðinga átti 3 fulltrúa á
26. þingi SSÍ sem haldið var dagan 4 - 5. desember í Reykjavík. Umræðan um
atvinnu og kjaramál var að vanda fyrirferðamikil og eins hvert skyldi stefna varðandi
hugsanlegar aðildarviðræður Íslendinga að ESB. Á þinginu flutti Aðalsteinn
Leifsson athyglisverðan fyrirlestur um stöðu Íslands ef kæmi til viðræðna um
aðildarumsókn. Má segja að fyrirlestur Aðalsteins hafi svarað mörgum spurningum
sem brunnu á þingfulltrúum svo sem hvernig yfirráðum okkar yfir auðlindum verði
háttað ef Ísland yrði aðili að ESB. Þá voru öryggis- og tryggingarmál einnig
nokkuð fyrirferðarmikil, enda mikið hagsmunamál sjómanna að forvörnum sé þannig
háttað að sem minnstar líkur séu á slysum til sjós. Í lok þings voru samþykktar tvær ályktanir,
önnur um
kjara- og atvinnumál og
hin um öryggis- og tryggingarmál. Þess má geta
að Sævar Gestsson fulltrúi Verkalýðsfélags Vestfirðinga var kjörinn til áframhaldandi
setu í sambandsstjórn SSÍ fyrir hönd félagsins.
