Ákvörðun um breytingu á réttindum tekin á aðalfundi sjóðsins 21. maí
Tryggingafræðileg úttekt Lífeyrissjóðs Vestfirðinga miðað við síðustu áramót liggur nú fyrir, en samkvæmt þeirri úttekt þá þá er staða sjóðsins neikvæð um 16%. Rétt er að geta þess að vegna góðrar ávöxtunar undanarin ár þá hafa lífeyrisréttindi sjóðfélaga hækkað umtalsvert umfram verðbólgu, en frá árinu 2002 hefur hækkunin numið 22,4% umfram hækkun vísitölu neysluverðs.
Lífeyrissjóðirnir á Íslandi hafa að undanförnu legið undir ámæli fyrir áhættusæknar fjárfestingar og ofurlaun framkvæmdarstjóra. Í þeim efnum eru allir sjóðirnir settir undir sama hatt og skiptir þá litlu máli hvort varlega hafi verið farið í fjárfestingum eða launagreiðslum stillt í hóf. Þannig hefur málum einmitt verið háttað hjá Lífeyrissjóði Vestfirðinga, hófstilltar launagreiðslur og dreifð áhættufjárfesting.
Í kjölfar tryggingafræðilegrar úttektar á sjóðnum var send eftirfarandi fréttatilkynning:
"Hlutverk lífeyrissjóða er að ávaxta iðgjöld sjóðfélaga og mótframlag atvinnurekenda, þannig að sjóðurinn geti á hverjum tíma staðið við greiðslu lífeyris.
Tryggingafræðileg úttekt Lífeyrissjóðs Vestfirðinga miðað við síðustu áramót liggur nú fyrir. Eins og hjá flestum öðrum lífeyrissjóðum hefur orðið töluverð lækkun á eignum sjóðsins. Þær efnahagslegu hamfarir, sem gengið hafa yfir þjóðfélagið og raunar um heim allan hafa að sjálfsögðu mikil áhrif á stofnanir eins og lífeyrissjóði.
Undanfarin ár hafa verið lífeyrissjóðunum mjög hagfelld og lífeyrisréttindi sjóðfélaga verið hækkuð verulega umfram verðbólgu um margra ára skeið. Lífeyrissréttindi sjóðfélaga í Lífeyrissjóði Vestfirðinga hafa verið hækkað um 22,4% frá árinu 2002 umfram hækkun vísitölu neysluverðs. Rétt er að halda því til haga að lífeyrir fylgir ávallt hækkunum á vísitölu neysluverðs og hefur því hækkað um 18,8 % frá 1. Janúar 2008, sem er mun meira en laun á almennum vinnumarkaði .
Að öllum líkindum er óhjákvæmilegt að skerða lífeyrisréttindi nú, en ekki liggur fyrir hversu mikil sú skerðing verður. Væntanlega munu lífeyrisgreiðslur ekki lækka niður í það sem þær voru í ársbyrjun 2008.
Verkefni stjórnar Lífeyrissjóðs Vestfirðinga er að ávaxta fé sjóðsins sem best og öruggast. Rétt er að benda á að sjóðurinn hefur dreift áhættu sinni mjög mikið undanfarin ár, en ýmsir fjárfestingarkostir sem þóttu áhættulitlir urðu fyrir skakkaföllum í bankahruninu, en ekki má gleyma þeim hagnaði sem sjóðfélagar hafa þegar haft vegna góðrar ávöxtunar undanfarinna ára.
Sömuleiðis er hlutverk stjórnar sjóðsins að gæta aðhalds í öllum kostnaði við rekstur hans. Í þeim efnum er mikil aðgæsla höfð, sem kemur fram í ársreikningum undanfarinna ára á heimasíðu sjóðsins. Framtíðin gefur vonandi tækifæri til að finna ávöxtunarleiðir í breyttu efnahagsumhverfi, sem gerir sjóðnum mögulegt að hækka lífeyrisréttindi á ný.
Endanleg ákvörðum um breytingu á réttindum verður tekin á ársfundi sjóðsins 21. maí n.k., sem er öllum opin og verður haldinn á Hótel Ísafirði.
