Hlutastörf og hlutabætur
Að tilstuðlan félags- og tryggingamálaráðherra, ASÍ og SA hafa verið gerðar breytingar á lögum um atvinnuleysistryggingar og Ábyrgðasjóð launa sem er ætlað að koma til móts við breyttar aðstæður á vinnumarkaði og þá áherslu sem lögð hefur verið á mikilvægi þess að sem flestir geti verið virkir þátttakendur á vinnumarkaði að einhverju leyti, sjálfum sér og samfélaginu til hagsbóta. Á sama tíma og þessar tillögur eru til þess fallnar að draga úr aukningu á atvinnuleysi, þá er þeim ætlað að koma betur til móts við aðstæður launafólks sem þarf að taka á sig kjaraskerðingu í formi minnkaðs starfshlutfalls vegna tímabundins rekstrarvanda fyrirtækis þess er það starfar hjá. Lögin voru afgreidd á alþingi í gær.
Á heimasíðu SGS er hægt að nálgast frekari upplýsingar um hvað þessar breytingar gætu haft í för með sér fyrir þá sem hafa orðið fyrir skertu vinnuhlutfalli. Þar eru einnig tekin nokkur dæmi um hvaða forsemdur eru lagðar til útreikninga á hlutabótum. Á vef ASÍ er einnig er hægt að nálgast upplýsingar um þessar breytingar sem og lögin sjálf.
Þetta er mjög mikilvægt skref í áttina að því að koma á móts við þá sem verða fyrir skerðingu á starfshlutfalli. Rétt að vara launafólk við því að taka ekki á sig tekjuskerðingu í formi launalækkunar þegar ekki kemur til skert starfshlutfall. Með því að taka þátt í þannig samkomulagi þá skerðir viðkomandi rétt sinn á hlutabótum frá atvinnuleysistryggingasjóði. Þeir sem eru í forsvari hjá fyrirtæki sem ætlunin er að skerða starfshlutfall, verða að sækja um hlutabæturnar fyrir sitt starfsfólk, þannig verði tryggt að allir sem starfa hjá því fyrirtæki fái réttar bætur.
