Orðsending til ríkisstjórnar Íslands frá Þingeyrarakademíunni
Þingeyrarakademían að störfum. Ljósmynd. Kristján Ottósson
Formaður Verk Vest hefur fengið góðfúslegt leifi Þingeyrarakademíunnar til að birta eftirfarandi orðsendingu til ríkistjórnar Íslands.
Þingeyrarakademían er stór hópur karla og kvenna sem stundar morgunsund og heita pottinn á Þingeyri. Þar eru ýmiskonar innanlands- og heimsvandamál rædd og jafnvel leyst. Þingeyrarakademían kemur til dyranna eins og hún er klædd.
Þingeyrarakademían samþykkti 3. júlí 2017 eftirfarandi ályktun:
"Afturvirkar launahækkanir í eingreiðslum til æðstu embættismanna um milljónir króna koma eins og skrattinn úr sauðarleggnum öðru hvoru. Þær eru eins og blaut tuska framan í launamenn, einkum þá sem lægstu hafa launin. Aldrei hafa menn heyrt talað um afturvirkar launahækkanir neðanfrá. Það er ekki hægt annað en leggja til að lög um kjararáð, sem stendur fyrir þessum ósköpum, verði afnumin við fyrsta tækifæri. Núverandi kerfi er öllum til skammar.
Þingeyrarakademían leyfir sér að benda á að semja ætti um laun allra ríkisstarfsmanna á einu bretti framvegis. Happa- og glappaaðferðir ganga ekki í launamálum.
Jafnframt gerum við að tillögu okkar að ellilífeyrisþegar, sem ekkert hafa til að moða úr nema einfaldan ellilífeyri, fái strax eina milljón króna og það skattfrjálst, úr sameiginlegum sjóði landsmanna sem afturvirka eingreiðslu. Hér er líklega um að ræða 2-3 þúsund manns. Flestir þeirra hafa unnið baki brotnu fyrir landið alla sína tíð og eiga þetta inni hjá ríkissjóði. Þó fyrr hefði verið. Þeir sem við kjötkatlana sitja ættu að skilja þetta manna best! "
