Fréttir

Samkvæmt 4. gr. orlofslaganna er orlofstímabilið frá 2. maí - 15. september og skal orlof veitt í einu lagi á tímabilinu. Þó er heimilt samkvæmt kjarasamningum stéttarfélaganna að stytta orlofið á tímabilinu þannig að aldrei verði veittir færri en 14 dagar samfellt á sumarorlofstímabilinu, enda liggi sérstakar rekstrarástæður að baki. Í því samhengi er rétt að benda á að sé orlof tekið utan ofangreinds orlofstímabils að ósk atvinnurekanda þá lengist orlofið um 25%.  Þau fyrirtæki sem hyggja á sumarlokun ber að gera það með minnst 1 mánaðar fyrirvara og skal sú ákvörðun liggja fyrir eigi síðar en 1. apríl þannig að hún nái til allra starfsmanna.

Helstu breytingar sem verða á þessu orlofsári er að hjá verslunar- og skrifstofufólki ásamt iðnaðarmönnum sem hafa starfað 5 eða 10 ár hjá sama fyrirtæki bætist við 1 dagur. Þannig verður t.d. heildar orlofsréttur eftir 10 ár hjá sama fyrirtæki 30 dagar og 13,04% orlofslaun.
 
Þá er einnig rétt að minna á orlofsuppbótina en hækkunum sem þar eiga að koma inn samkvæmt gildandi kjarasamningi hefur ekki verið frestað. Orlofsuppbótina ber að greiða þann 1. júní ár hvert til allra starfsmanna sem hafa verið samfellt í starfi hjá sama atvinnurekenda í 12 vikur á síðustu 12 mánuðum. Greiðslan skal miðuð við starfshlutfall og starfstíma á orlofsárinu.

ORLOFSUPPBÓT 2009
Hjá verkafólki - kr. 25.200
Hjá verslunar og skrifstofufólki - kr. 19.000
Starfsmenn sveitarfélaga - kr. 25.200
Hjá iðnaðarmönnum - kr. 25.200
Iðnnemar fá sömu orlofsuppbót og aðrir.

Nánari upplýsingar má finna í tilkynningadálknum á síðunni.