Fréttir

Þann 7. október féll dómur í máli sem lögmenn Verk-Vest höfðuðu gegn útgerð á Bíldudal til innheimtu  vangreiddra launa til háseta á dragnótaskipi. Maðurinn starfaði hjá útgerðinni frá því í des. 2006 til júní 2007, bæði við dragnótaveiðar og störf sem tengdust fiskeldi. Enda þótt skipið landaði töluverðum afla á markað, t.d. í janúar 2007, fékk maðurinn aðeins greitt tímakaup en ekki aflahlut eins og kveðið er á um í kjarasamningi. Útgerðin bar fyrir sig að Hafrannsóknarstofnun hefði átt hlut í aflaverðmæti skv. samningi stofnunarinnar og útgerðarinnar um tilraunaverkefni í fiskeldi. Að auki hefði í upphafi verið gerður munnlegur samningur milli útgerðar og áhafnar um tímakaup.
Hásetinn leitaði til félagsins sem gerði kröfu á hendur útgerðinni um aflahlut skv. kjarasamningi Alþýðusambands Vestfjarða. Útgerðin hafnaði kröfunni og var málið þá fengið lögmönnum Verk-Vest til innheimtu. Eins og fyrr segir liggur dómur nú fyrir.
Í dómsorði segir m.a:

"Stefnda hefur ekki lagt fram önnur gögn til sönnunar tilvistar þess munnlega samkomulags, sem félagið byggir varnir sínar á í málinu, en frá því sjálfu stafa, sbr. bréf félagsins til Verðlagsstofu skiptaverðs frá 7. ágúst 2007 og til Verkalýðsfélags Vestfirðinga frá 5. nóvember sama ár. Þá verður við úrlausn málsins ekki með nokkru móti fram hjá því litið að launakjör sem samið er um í kjarasamningum eru lágmarkskjör, sbr. 7. gr. laga nr. 80/1938 um stéttarfélög og vinnudeilur og 1. gr. laga nr. 55/1980 um starfskjör launafólks og skyldutryggingu lífeyrisréttinda. Hefur stefnda engin rök fært fyrir því að félaginu hafi, þrátt fyrir tilvitnuð lagaákvæði, verið heimilt að semja við stefnanda um lakari launakjör en samkvæmt fyrrgreindum kjarasamningi. Samkvæmt þessu þykja varnir stefnda í málinu haldlausar með öllu."

 

Þá var tekið fram, að þar sem útgerðin hefði ekki lögskráð manninn á skipið, né heldur gert við hann ráðningarsamning, en hvort tveggja er skylt skv. lögum, væri enn frekari ástæða til að meta allan vafa á ráðningarskilmálum launþeganum í hag.

Útgerðin var dæmd til að greiða hásetanum 962.099 kr. með dráttarvöxtum, auk 270.000 kr. í málskostnað.

Bergþóra Ingólfsdóttir hdl. rak málið fyrir hönd hásetans.