Þing SGS ályktar um Icesave
Þing Starfsgreinasambandsins samþykkti rétt í þessu ályktun um mikilvægi þess að Icesavemálinu verði lokið hið fyrsta. Ályktunin fer hér á eftir:
Þing Starfsgreinasambands Íslands leggur áherslu á mikilvægi þess að ljúka Icesave málinu hið fyrsta. Ljóst er að endurreisn efnahagslífsins hefur tafist vegna þessa nöturlega máls og litlar líkur á því að kraftur komist í uppbyggingu efnahags- og atvinnulífsins á meðan því er ólokið og mikil hætta er á einangrun landsins.
Því lengur sem Alþingi og ríkisstjórn heykjast á að klára þetta erfiða mál því verri verða hinar efnahagslegu afleiðingar þess fyrir land og þjóð. Það er því skýr krafa þings Starfsgreinasambandsins að þessu deilumáli verði lokið nú þegar.
