Fréttir

Ekki hefur orðið vart við það á félagssvæði Verk Vest að fyrirtæki innan raða Samtaka atvinnulífsins (SA) hafi verið að beita starfsfólk þrýstingi um að falla frá umsömdum kauphækkunum. Samkvæmt upplýsingum sem komu fram á fundi miðstjórnar ASÍ hefur borið á því að einstaka fyrirtæki innan raða SA hafi hótað starfsfólki að ef fyrirtækið þurfi að standa við umsamdar og löngu frestaðar kauphækkanir þá verði starfsfólkinu einfaldlega sagt upp. Að einstaka fyrirtæki skuli ætla beita þessum aðferðum þegar launafólk hefur frestað umsömdum launahækkunum um marga mánuði er með öllu óásættanleg framkoma. 

Málið var tekið fyrir á miðstjórnarfundi ASÍ í gær og kom fram mjög hörð gagnrýni á að einstaka fyrirtæki skuli nýta sér þá stöðu sem er á vinnumarkði til að þvinga fram með ofbeldi launalækkanir. 
Orðrétt segir á vef ASÍ " Almennt launafólk hefur undanfarna mánuði sýnt atvinnulífinu mikinn skilning á erfiðri stöðu fyrirtækjanna og í reynd axlað mikla ábyrgð á stöðu efnahagsmála með því að fresta umsömdum launahækkunum bæði á þessu ári og því næsta um sex til átta mánuði. Það er því algerlega óviðunandi að einstaka fyrirtæki þakki fyrir sig með því að þvinga fólk til að afsali sér þessum hækkunum í skjóli óbeinna hótanna um atvinnumissi. Miðstjórn ASÍ krefst þess að frá þessu verði fallið og tryggt verði að allir félagsmenn njóti þeirra hækkana sem um var samið í kjarasamningunum í febrúar 2008."

Verkalýðfélga Vestfirðinga tekur undir með miðstjórn ASÍ og hvetur félagsmenn sína til að koma á framfæri við félagið ábendingum verði þeir varir við slíkar þvinganir.