Verkalýðsfélagið Baldur á Ísafirði 100 ára
Merki Baldurs
Síldarsöltun á Ísafirði
Pétur Sigurðsson, Helgi Ólafsson og Guðjón Kr. Harðarson á þingi ASÍ
Það var 1. apríl 1916 sem 44 verkamenn á aldrinum 18-66 ára stofnuðu Verkmannafjelag Ísafjarðar einsog það hét í fyrstu. Í ársbyrjun 1917 var nafni félagsins breytt og hét eftir það Baldur. Stjórn félagsins skipuðu Sigurður H. Þorsteinsson formaður, Kristján Dýrfjörð Kristjánsson varaformaður, Jón Gunnar Hallgrímsson ritari og Magnús Jónsson gjaldkeri. Félagið náði fljótt útbreiðslu meðal verkakarla í kaupstaðnum og í árslok voru félagsmenn orðnir 89.
Baldursfélagar stóðu jafnframt að stofnun Verklýðssambands Vesturlands árið 1927, sem síðar varð Alþýðusamband Vestfjarða. Á vegum Alþýðusambandsins voru kjör verkafólks og sjómanna á Vestfjörðum samræmd í krinum 1950, en áður höfðu laun verkafólks oft verið lægri á hinum smærri stöðum. Samstaða Baldursfélaga réði miklu um að félögin á Vestfjörðum náðu þeim áfanga.
Verkalýðsfélagið Baldur var eitt af níu félögum sem sameinuðust í Verkalýðsfélagi Vestfirðinga árið 2002. Næstu ár gengu fleiri félög til liðs við Verk Vest og gerðust deildir í félaginu, þar á meðal var Sjómannafélag Ísfirðinga. Verkalýðsfélag Vestfirðinga sameinar verkafólk, sjómenn, verslunarmenn og iðnaðarmenn frá nær öllum Vestfjörðum, frá Hólmavík til Reykhóla í eitt öflugt stéttarfélag.
Verkalýðsfélagið Baldur var stofnað fyrir 100 árum til að vinna að auknum réttindum og bættum kjörum verkafólks undir áhrifum frá hugsjónum um jöfnuð og réttlæti. Þær hugsjónir eru enn í fullu gildi. Merkið sem verkamenn og sjómenn reistu veturinn og vorið 1916, er nú haldið á lofti af af félögum Verkalýðsfélags Vestfirðinga.
Í tilefni þess að Baldur og Sjómannafélag Ísfirðinga eiga 100 ára starfsafmæli á þessu ári verður opnuð sýning í Gamla sjúkarhúsinu, safnahúsi Ísfirðinga, 16. apríl.
Ítarlegri samantekt má nálgast hér.
Formenn Verkalýðsfélagsins Baldurs:
Sigurður H. Þorsteinsson 1916-1920
Stefán J. Björnsson 1920-1921
Finnur Jónsson 1921-1932
Hannibal Valdimarsson 1932-1939
Helgi Hannesson 1939-1949
Guðmundur G. Kristjánsson 1949-1954
Björgvin Sighvatsson 1954-1957
Sverrir Guðmundsson 1957-1968
Pétur Pétursson 1968-1974
Pétur Sigurðsson 1974-2002
Formenn Baldurs, deildar innan Verkalýðsfélags Vestfirðinga
Róbert B. Jóhannesson 2003-2005
Ólafur Baldursson 2005-2016
